ปัญหาแหม่นอีหยังน้อ?

กลอนด้นอีสาน...ปัญหาแหม่นอีหยังน้อ?

ปัญหาป้องกัน

มนุษย์สองหูกิ้นบินบ่เป็นมียนต์นั่งสั่งทางโทรกะได้ไผเห็นแล้วเงิดงง หลงอบายทางชั่วมัวเมาเอาใจมากอยากบ่พอขอสู่มื้อถือเอาหม่องถูกใจ โลกถูกอุปโลกน์ไว้เป็นที่ลองภูมิสามโลกามองเห็นสร้างสมลมเล่นดูแล้วเห็นจริงแน่แนวแลดูฮู้หม่องค่อง ลองทบทวนรอบข้างแล้ววางไว้ให้หิ่นตรอง ปัญหาที่ถูกต้องมองเบิ่งบ่เถิงใจเบี่ยงเบนไปทางหัวทั่วตนตกใต้ ตรงข้ามใจตนตั้งหวังเอาทางถืกปล่องลองคิดดูถี่ถ้วนจั่งชวนเจ้าพิศดู เบิ่งดีแล้วจั่งสิฮู้ปัญหาเกิดบ่มองเห็นป้องกันเข็ญความจริงสิ่งบ่ดีบังไว้ แนมกลายไปทางหน้าหันหลังมาแนมสอดส่องซอดไปหม่องอื่นพุ้นสูญสิ้นปิ่นผัน สิ่งที่เกิดขึ้นนั่นใจบ่เปิดยอมรับบ่ยอมปรับเห็นจริงสิ่งบ่ดีกลบไว้ ป้องกันใจเห็นท่างบ่แนมทางบ่อนสิย่างถางพุ่มไม้ใส่หญ้าถมไว้บ่ให้เห็น เอากิเลศแนวละเว้นโตบ่เฮ็ดกะตั๋วเอาแนมเห็นสายยาวยาวกะเหล่าเขียนแนวสั้นปัญหามีบ่ยอมแก้แวไปหาหว่าแนวใหม่เอาขี้แกลบทบไว้บ่ดี
 ฮ้ายกะส่างอม ขมยังบอกยศย่องดีเติบบ่มีติ มีแต่ของดีงามชั่วกะตามยอย่อง แถมมองเห็นแต่ทางใต้กลายทางเหนือเบื่อทางเก่าป้องกันเรื่องผู้อื่นเว้าเมายอย่องแต่เจ้าของ ปัญหาเกิดกะฟ้าวย่องหว่าแต่บ่เป็นหยัง เป็นตาซังคนคิดคดหาพาคุ้ยคุยแต่แนวหาเล่นเป็นอีหลียกย่องก่อน ยามเดือดร้อนกะอ่อนสู้ทนฮู้แต่บ่เฮียน สิ่งที่เฮ็ดกะเกิดเพี้ยนแต่บ่รับความจริง ผิงแดดยามฝนตกกะหว่าดีบ่มี
ฮ้อน ออนซอนยามหนาวต้องบ่ก๋าลองห่มผ้าใหญ่ติหัวใจผู้ใส่ผ้าหนานั่นหว่าบ่ดี เว้าแต่มีหลื่นบ้านย้านหมู่หว่าโตซวย ฮอดควายหายบ่ยอมหาอ้างหว่าขายหนีแล้ว โบราณแนวเฮียนฮู้ดูบ่ดีติหว่าเปิ่น นุ่งผ้าเขินกะส่างย่อง แนวข้องบ่เปิดฝา พินิจดูก่อนเถอะน่าดูเถอะหว่าปัญหาหด แนวปัญหาบ่มีลดอ้างหว่าโตบ่มีฮ้อน นอนฮิมซานลมหนาวต้องคุยจองหองหว่าฮ้อนเห่ง นักเลงอยู่สู่มื้อบ่กลัวย้านคุกขัง ปิดบังแนวแถวเรื่องเพียงหาทางอ้างใจหมู่ โตหากมีบาปล้นบ่สนเจ้าผู้บวชนาน ป้องกันไว้รอบด้านบ่ย้านหลื่นคนถามตามทางเขาพาไปหากแต่ใจโตเลี้ยว เขาเทียวทางสองแพ่งโตแสดงสามด่านบ่อยากผ่านทางหมู่เข้าหัวย้ามหากหมู่หลง ป้องกันสิ่งคดโค้งโอ้อวดอ่งหว่าโตไค บ่สนใจหาทางลดหว่าแต่โตโสแก้ บ่ยอมแลปัญหาใกล้หาทางไปปัญหาใหม่ปัญหาเก่าแก้บ่ได้ยังแนมข้ามอีกหนึ่งทาง ป้องกันโตเทื่อเพิ่นอ้างบ่มีดอกปัญหาใจ ไขสมองลองหัวเรื่องชั่วดีบ่มีเว้า เอาปัญหาถมไว้ไปทางดีมีทางใหม่ บ่สนใจสิคิดแก้แนวใดแย่ข่อยบ่ทำถมปัญหาอีกซ้ำบอกแต่หว่าบ่เคยมีดีทุกแนวโตเฮ็ดเพชรดังฝังไว้ ปัญหาใจบ่ยอมเว้าเฮาคนดีบ่มีชั่ว ตลอดตัวข้อยผู้นี้ดีแล้ว เจ้าอย่าหยัน ได้ยินบ่